म्यानचेष्टर विस्फोटमा १९ को ज्यान गयो ५९ घाइते


एजेन्सी÷ बेलायतको मन्चेस्टर महानगरमा शक्तिशाली बम बिस्फोट हुँदा कम्तीमा १९ जनाको ज्यान गएको छ । अन्य ५९ जना घाइते भएको स्थानीय सञ्चार माध्यम स्काइ न्युजले पुष्टि गरेको छ ।
सोमबार २२ मे को साँझ आयोजित सांगितिक सन्ध्याको अन्तमा अमेरिकी कलाकार एरियाना ग्रान्डेको प्रस्तुति सकिएलगत्तै स्थानीय समयानुसार राति १०ः३५ बजे (नेपाली समय अनुसार मंगलबार बिहान सवा चार बजे तिर) म्यान्चेस्टर संगितस्थल (एरिना) परिसरमा भयानक आवाज सहित उक्त बम बिस्फोट भएको थियो ।
बेलायती प्रहरीले यस बिस्फोटलाई आतङ्ककारी आक्रमणको संज्ञा दिएको छ । कुनै आतङ्कबादी संगठनको मानिसले आत्मघाती बम बिस्फोट गराएको हुन सक्ने सम्भावनाप्रति अनुसन्धान भै रहेको स्थानीय सञ्चार माध्यमहरुले आशंका गरेका छन् ।
बम बिस्फोट पश्चात अधिकांश युवक, युवतीहरु लगायत हजारौं दर्शकहरु अत्यन्त भयभीत भै सर्बत्र भाग दौड मच्चिएको थियो । घाइतेहरुको उपचारार्थ सयौं एम्बुलेन्स परिचालन गरिएको थियो ।
स्थानीय अधिकारीहरुले तत्कालै म्यान्चेस्टर एरिना परिसरदेखि सँधै अति ब्यस्त रहने भिक्टोरिया रेल्वे स्टेसनसम्मको क्षेत्र र बाटाहरु पूरै नियन्त्रणमा लिएर कडा जाँच गर्दै घटनाको छानबीन र बिस्फोटनकारीको आशंकित समूहलाई पक्राउ गर्ने प्रयास गरेका छन् । उक्त क्षेत्रभरी बाक्लो संख्यामा सुरक्षाकर्मी परिचालन गरिएको छ ।
म्यान्चेस्टर एरिना परिसरको क्षमता २१ हजार जना जतिको रहे ता पनि घटना हुँदा के कति दर्शक उपस्थित थिए भन्ने प्रष्ट भै सकेको छैन । भयभीत दर्शकहरु परिसर बाहिर निस्कन भाग दौड मच्चिँदा केही महिला तथा बालबालिकाहरु समेत घाइते समेत भएका छन् ।
घटनापश्चात् बेलायतीहरुमा आपसेआप एक अभूतपूर्व राष्ट्रिय एकताको भावना उत्पन्न भएको छ । घाइतेहरुलाई प्राथमिक उपचार गर्न होस् वा अस्पताल पु¥याउन, नगरवासीहरुमा एक अर्काप्रति गहिरो सहानुभूति जागेको छ । कतिपयले थकित, भयभीत, मानसिक रुपले त्रस्त वा साधारण चोट पटक लागेकाहरुलाई आआफ्नो घरमा बोलाई खाना पिनाले सत्कार गर्ने वा पलंग, बिछ्यौना, ओढ्ने ओछ्याउने दिई सेवा पु¥याइ रहेका छन् ।
यसैबीच, म्यान्चेस्टर बम बिस्फोटको भयाबह घटनाको केही बेर मै म्यान्चेस्टर एरिना परिसरनजिक अवस्थित एक स्थानीय पार्क – क्याथेड्रल गार्डेन्समा पनि रिमोट कन्ट्रोलरको सहायताले अर्को बम बिस्फोट गराइएको म्यान्चेस्टर प्रहरीले ट्विटरमार्पmत् जानकारी गराउँदै आत्म सुरक्षाका लागि सजग र सतर्क रहन नगरवासीहरुलाई आग्रह गरेको छ ।
दक्षिणी आयरल्याण्डका बेलायत विरोधी सशस्त्र समूह – आइरिस रिपब्लिकन आर्मीले सन् १९९६ मा यसै म्यान्चेस्टर एरिना परिसरबाट केही सय मिटर टाढा रहेको म्यान्चेस्टर सिटी सेन्टरमा एक शक्तिशाली बम बिस्फोट गराउँदा सिटी सेन्टरको ठूलो क्षेत्र क्षतबिक्षत भएको थियो ।

तपाईको प्रतिक्रिया

सम्बन्धित समाचार