पर्यटकको रोजाइ बागलुङको ‘गाईघाट झरना’


बागलुङ सिथ्त ‘गाईघाट झरना’ पर्यटकको रोजाइमा पर्न थालेको छ । जिल्लाको ताराखोला गाउँपालिका–१ स्थित ‘गाईघाट झरना’ पर्यटकीय गन्तव्यका रुपमा विकसित हुन थलोपछि पर्यटकको रोजाईमा पर्न थालेको हो ।
प्राकृतिक सुन्दरतायुक्त झरना अवलोकन गर्ने आन्तरिक पर्यटकको संख्या दैनिक बढ्दो छ । वर्षौंदेखि ओझेलमा परेको झरना प्रचारप्रसार र पर्यटकीय पूर्वाधार निर्माणले चर्चामा आउन थालेको हो ।
तीन वर्षअघि झरनालाई पर्यटकीय गन्तव्य बनाउन गलकोट घुम्टे पर्यटन विकास केन्द्रले योजनाबद्ध रुपमा काम शुरु गरेको थियो । पर्यटकीय पूर्वाधार निर्माणमा सरकारी सहयोग र जनश्रमदानका कारण अहिले झरनाले नयाँ रुप पाएको छ ।
झरना छेउ पौडी पोखरी, वनभोजस्थल, विश्रामस्थल, पदमार्गलगायतका संरचना निर्माण गरिएको छ । महत्व भएर पनि पछाडि परेको झरनामा पूर्वाधार बनेपछि वर्षायाम बाहेकका समयमा पर्यटकहरु उल्लेख्य रुपमा पुग्न थालेका छन् ।
उपाध्यक्ष राज थापाका अनुसार पर्यटकीय याममा दैनिक सयौँ आन्तरिक पर्यटक झरनाको अवलोकनका लागि पुग्ने गर्छन् । पूर्वाधार निर्माणकै क्रममा झरनाको भित्रपट्टि फेला परेको गुफाले थप पर्यटकीय आकर्षण थपेको छ । तीन दर्जनबढी अट्ने गुफालाई धार्मिक आस्थासँग जोडेर पूजाआजा गर्ने व्यवस्था मिलाइएको छ । गाईघाटदेखि नजिकै रहेको भूताह गल्छीसम्म पुग्न पदमार्ग बनाउने योजना केन्द्रको छ ।
“पचास मिटर अग्लो झरनामा क्यानोनिङ सञ्चालन गर्ने योजना छ”, सचिव थापाले भन्नुभयो । गाईघाट झरनासँगै भूताह गल्छीको पर्यटकीय विकास गर्ने उद्देश्यले काम अघि बढाइएको उहाँले बताउनुभयो । गर्मी याममा झरना अवलोकनसँगै प्राकृतिक तलाउमा स्नान र पौडीका लागिसमेत पर्यटक आउने गरेका छन् । पछिल्लो समय झरना क्षेत्र वनभोज जानेको रोजाइमा पर्ने गरेको छ ।
बाहिरी जिल्लाबाट समेत आन्तरिक पर्यटक झरना अवलोकनका लागि आउने गरेका छन् । विद्यार्थी शैक्षिक अवलोकन भ्रमणका लागि जाने गरेका छन् । दरमखोला किनारमा अवस्थित झरनामा माछा मार्न रुचाउने पर्यटकको समेत रोजाइमा पर्छ । गाईघाट झरनालाई ताराखोला गाउँपालिका छिर्ने प्रवेशद्वारका रुपमा समेत लिने गरिन्छ ।

सदरमुकामदेखि १० कोष पश्चिममा अवस्थित झरनालाई पर्यटकीय गन्तव्य बनाइने गाउँपालिका अध्यक्ष प्रकाश घर्तीमगरले बताउनुभयो । उहाँले भन्नुभयो ‘पर्यटन क्षेत्रको विकासका लागि गाउँपालिकाले बजेटमा प्राथमिकता दिइएका छौं ।’ पर्यटनसँग सम्बन्धित संस्थासँग मिलेर योजनाबद्ध रुपमा काम गर्ने पनि उहाँले बताउनुभयो ।

तपाईको प्रतिक्रिया

सम्बन्धित समाचार