पर्यटकीय क्षेत्रको विकासमा स्थानीयले गरे डेढ करोड लगानी


म्याग्दी । पर्यटकीय क्षेत्रको विकासका लागि स्थानीयले डेढ करोडभन्दा बढी लगानी गरेका छन् । अन्नपूर्ण गाउँपालिका–५ को खोप्रा र खयरबाराही क्षेत्रको पर्यटकीय क्षेत्रमा पूर्वाधार निर्माणमा स्थानीयबासीले उक्त रकम लगानी गरेका हुन् ।
पर्यटकीय र धार्मिक पर्यटनको समेत प्रशस्त सम्भावना बोकेको खोप्रा र खयरको विकासका लागि स्थानीयवासीले पूर्वाधार निर्माण गरेका हुन् । स्थानीयले पर्यटन प्रवर्धनका लागि पाउद्वार गाउँदेखि खोप्रा लेकहुँदै खयरसम्म पुग्ने पदमार्ग निर्माण गर्नुका साथै विश्रामस्थल र सामुदायिक होटल समेत निर्माण गरेका छन् ।
खयर तालको अवलोकन र खयर बारहीको पूजापाठका लागि जाने पर्यटक तथा भक्तजनको सुविधाको लागि थानको पुनःनिर्माणसहित व्यवस्थित पदमार्ग र विश्रामस्थललगायतका भौतिक पूर्वाधार निर्माण गरिएको खयरभारानी थान तथा क्षेत्र संरक्षण कोषका संयोजक राजु पुनले बताउनुभयो ।
खयरबाराही अन्नपूर्ण हिमालको पूर्वी मोहोडाको फेदीमा समुद्री सतहदेखि चार हजार ६३० मिटरको उचाइमा पर्दछ । जनैपूर्णिमाको अवसरमा सो स्थानमा पूजाआजा र भाकल गरेमा मनोकांक्षा पूरा हुने जनविश्वास छ ।
चन्दा संकलन र श्रमदानबाटै खोप्रादेखि खयरबाराही थानसम्म पदमार्ग, चौतारीलगायत पूर्वाधार निर्माण गरिएको छ । खयर क्षेत्रमा पूर्वाधार निर्माणको लागि अभियान थालिएको ६ वर्षमा एक करोड १५ लाखभन्दा बढीको पूर्वाधार निर्माण गरिएको अभियन्ता पुनले बताउनुभयो ।
खयरबाराही थानको पुनःनिर्माणमा ३५ लाख रुपैंयाँ लगानी भएको छ । यस क्षेत्रको दर्शन तथा भम्रणमा पुग्ने भक्तजन र पर्यटकलाई लक्षित गरी खोप्रामा दुईवटा र खयर खोलामा चारवटा बास बस्ने ठाउँ तथा खोप्रा र खयरखोलामा एक÷एकवटा भान्सा घर निर्माणमा २५ लाख लगानी भएको उनीहरुको भनाई छ ।
खयरबाराही जाने बाटोमा पर्ने खोप्रा लेक हिमशृंखला, सूर्योदय र पहाडी भूगोलको मनमोहक दृष्य अवलोकन गर्न पर्यटकीय गन्तव्य बनेको छ । खोप्राबाट धौलागिरि, निलगिरि, अन्नपूर्णलगायतका हिमशृंखलाको अवलोकन गर्न सकिन्छ ।

तपाईको प्रतिक्रिया

सम्बन्धित समाचार