पर्यटक प्रहरीलाई संघीय संरचनाअनुसार लैजानुपर्नेमा जोड


मुलुक संघीय संरचनामा गएसँगै पर्यटक प्रहरीलाई संघीय ढाँचामा लैजानुपर्नेमा जोड दिइएको छ ।
पर्यटक प्रहरीको ३९औं स्थापना दिवसका अवसरमा राजधानीमा आयोजित कार्यक्रमका वक्ताले समयअनुसार पर्यटक प्रहरी संरचनालाई मुलुकका सबै प्रदेशमा पु¥याउनुपर्ने बताएका हुन् ।
प्रहरी महानिरीक्षक प्रकाश अर्यालले पर्यटक प्रहरीलाई संघीय संरचनामा लैजान आवश्यक ऐन, कानून संशोधन गर्नुपर्ने बताउनुभयो । कतिपय पर्यटक सुरक्षाबिना जोखिमयुक्त भ्रमण गरिरहेकाले त्यसलाई रोक्नु पर्यटक प्रहरीको दायित्व भएको उहाँले बताउनुभयो । महानिरीक्षक अर्यालले सीमित स्रोत र साधनका बाबजुद पर्यटकको सेवा र सुरक्षाका लागि पर्यटक प्रहरीले खेलेको भूमिका प्रशंसायोग्य रहेको समेत बताउनुभयो । उहाँले भन्नुभयो ‘पर्यटक नेपालमा भित्रिएदेखि नफर्किदासम्म उनीहरुको सुरक्षाको जिम्मा पर्यटक प्रहरीले लिनुपर्छ ।’उहाँले भन्नुभयो ।
पर्यटन विभागका महानिर्देशक दिनेश भट्टराईले पर्यटकीय महत्व बोकेका अधिकांश क्षेत्रहरु दुर्गममा भएकाले पर्यटक प्रहरीले दुर्गम क्षेत्रलाई सेवा प्रदान गर्ने गरी कार्यक्रम ल्याउनुपर्ने बताउनुभयो ।
नेपाल पर्यटन बोर्ड सञ्चालक समितिका सदस्य दीपक महत, ट्रेकिङ एजेन्सिज एशोसिएसन अफ नेपाल (टान)का अध्यक्ष नवराज दाहाल, नेपाल पर्वतारोहण संघ (एनएमए)का अध्यक्ष सन्तवीर लामा, नेपाल उद्योग वाणिज्य महासंघका सदस्य रामशरण थपलियालगायतले दिगो पर्यटन विकासका लागि पर्यटकीय प्रहरीको योगदान महत्वपूर्ण रहेको भन्दै समयअनुसार पर्यटक प्रहरी सेवाको विस्तार गर्दै जानुपर्नेमा जोड दिनुभयो ।
सातजना प्रहरीले वि.सं. २०३५ माघ १२ देखि घुम्ती सेवाका रुपमा शुरु गरेको पर्यटक प्रहरी सेवामा हाल २२७ प्रहरी कर्मचारी कार्यरत रहेको पर्यटक प्रहरी एकाइका प्रमुख रुपा थापाले जानकारी दिनुभयो ।
पर्यटक प्रहरीले हाल मुलुकको काठमाडौं, पोखरा, चितवन, सोलुखुम्बु, मुस्ताङ, रसुवा, पर्सा, रुपन्देही, म्याग्दीलगायतका जिल्लाको २३ स्थानबाट पर्यटकलाई सेवा तथा सुरक्षा प्रदान गर्दै आएको छ ।

तपाईको प्रतिक्रिया

सम्बन्धित समाचार