पर्यटनमन्त्रीका सय दिने कार्यतालिका सार्बजनिक

संस्कृति, पर्यटन तथा नागरिक उड्डयन मन्त्रालयले सय दिनको कार्यतालिका सार्बजनिक गरेको छ । सय दिनमा गरिने मुख्य कामहरु प्रतिबद्धता सहित मन्त्रालयले सार्बजनिक गरेको हो । मन्त्रालयले शुक्रबार पत्रकार सम्मेलन गरी सय दिनमा १६ क्षेत्रमा ११० कार्य गर्ने जानकारी दिएको छ ।

त्रिभुवन अन्तर्राष्ट्रिय विमानस्थल सुधारदेखि मन्त्रालयअन्तर्गत पर्ने राष्ट्रिय गौरवका पाँच आयोजनालाई सय दिने मुख्य कार्यमा राखिएको छ । भूकम्पबाट क्षतिग्रस्त मुख्य सम्पदाहरुको पुनःनिर्माण, पर्यटन क्षेत्रको नीतिगत तथा कानूनी सुधार, कार्यपद्धतिमा सुधार लगायत रहेका छन् ।

संस्कृति संरक्षण र प्रवद्र्धन, ऐतिहासिक, पुरातात्विक एवं धार्मिक महत्वका सम्पदाको संरक्षण तथा अभिलेखको डिजिटाइजेसन र सुदृढीकरण, संग्रहालयको निर्माण तथा व्यवस्थापन सय दिनभित्र गरिनेछ ।

सय दिनको कार्यतालिकामा पर्यटकीय तथ्याङ्क अद्यावधिक गर्ने, दिगो पर्यटन व्यवस्थापन, पर्यटकीय सेवा सुविधाको गुणस्तरीयता, एकीकृत पर्यटन पूर्वाधार विकास, पर्यटन प्रवद्र्धन, हवाई उड्डयन सुरक्षा सुदृढीकरण र हवाई उद्योग व्यवस्थापन पनि मुख्य प्राथमिकतामा परेका छन् ।

पर्यटनमन्त्री रवीन्द्र अधिकारीले मन्त्रालयका उच्च अधिकारी मातहत निकायका प्रमुखको उपस्थितिमा १६ बुँदे कार्ययोजना सार्वजनिक गर्दै ती प्रतिबद्धताहरु पूर्ण रुपमा कार्यान्वयन गरिने बताउनुभयो ।

यी कार्ययोजनाहरु मन्त्रालय र मातहतका निकायको साझेदारिसहितको प्रतिबद्धता रहेकाले सफल कार्यान्वयन हुने मन्त्री अधिकारीले बताउनुभयो ।

प्रत्येक दिनलाई उपलब्धिमूलक बनाउन सय दिने कार्यक्रम ल्याइएको र अन्य अल्पकालीन र दीर्घकालीन योजना पनि क्रमशः ल्याउने तयारीमा रहेको मन्त्री अधिकारीले जानकारी दिनुभयो । उहाँले भन्नुभयो ‘यी सबै कामबाट मन्त्रालयलाई पारदर्शिता र सुशासनमैत्री बनाउने हाम्रो साझा लक्ष्य हो ।’

मुलुकको एकमात्र त्रिभूवन अन्तर्राष्ट्रिय विमानस्थलको विद्यमान चापलाई मध्यनजर गर्दै पर्यटन मन्त्रालयले हाल दैनिक १७ घण्टा सञ्चालन हुँदै आएको विमानस्थललाई अब दैनिक २१ घण्टा सञ्चालन गर्ने भएको छ ।

पर्यटनमन्त्री अधिकारीले अन्तराष्ट्रिय विमानस्थलको ब्यवस्थापन र उडान सुरक्षित बनाउन विमानस्थलको उडान लम्ब्याउने र विमानस्थललाई सबैखाले प्रविधिमैत्री बनाइने बताउनुभयो ।

पर्यटनमन्त्रीको मुख्य प्राथमिकतता अनुसार राष्ट्रिय गौरबको आयोजना दोस्रो निजगढ अन्तर्राष्ट्रिय विमानस्थललाई शीघ्र अघि बढाइनुका साथै निर्माणाधीन, पोखरा क्षेत्रीय अन्तराष्ट्रिय विमानस्थल र भैरहवा अन्तराष्ट्रिय विमानस्थल निर्माणलाई तीव्रता दिइने छ ।

मन्त्रालयका सचिव कृष्णप्रसाद देवकोटाका अनुसार भैरहवा विमानस्थलको निर्माण कार्य ४० प्रतिशत सम्पन्न भएको छ भने पोखरा विमानस्थलको काम भइरहेको छ ।
मन्त्री अधिकारीले पर्यटन रणनीति बनाउने तयारी भएको र पुरानो पर्यटन नीतिलाई परिमार्जन गरिने पनि बताउनुभयो ।

त्यस्तै पशुपति क्षेत्र विकास कोष र लुम्बिनी क्षेत्र विकास कोषलाई प्रभावकारी बनाइनुका साथै नयाँ धार्मिक पर्यटकीय गन्तव्यको पहिचान र प्रवद्र्धनलाई प्राथमिकता दिइने उल्लेख छ ।

भूकम्पबाट क्षतिग्रस्त ७५३ सम्पदामध्ये हाल ८२ वटा सम्पन्न भएको र यस अवधिमा थप १३ वटा सम्पदाको पुनःनिर्माण कार्य सम्पन्न हुने जनाइएको छ ।

पर्यटन ऐन, २०३५ लाई समयानुकूल परिमार्जन गरिनुका साथै परिवर्तित परिवेशअनुसार पर्यटन नीति, २०६५ परिमार्जन कार्य शुरु गरिने कार्ययोजनामा भनिएको छ ।

यसैगरी पर्यटन प्रवद्र्धनअन्तर्गत नेपाल भ्रमण वर्ष २०२० लाई सफल तुल्याउन सचिवालय स्थापना गरी विषयगत समिति गठन गरी कार्य प्रारम्भ गरिने तथा चीन र भारतका मुख्य तीन–तीन शहरमा पर्यटन सेल्स मिसनको आयोजना गरिने कार्ययोजना छ ।

पचासभन्दा बढी अन्तर्राष्ट्रिय सञ्चारमाध्यम र ब्लगरसहितको अन्तराष्ट्रियस्तरको हिमालयन ट्राभल मार्ट आयोजना गर्ने विदेशी पत्रकारलाई नेपालका पर्यटकीय स्थलको अवलोकन गराउने, नेपाल पर्यटन बोर्डको वेबसाइटलाई चिनियाँ भाषामा बनाई छलफल चलाइने तथा अन्तर्राष्ट्रिय सञ्चारमाध्यम बिबिसी, सिएनएन, ट्रिप एडभाइजर र लोन्ली प्लानेटमार्फत प्रवद्र्धन गर्ने कार्ययोजनामा समेटिएको छ ।

हवाई उड्डयनलाई सुरक्षित र व्यवस्थित बनाउन सन् २०१० देखि २०१७ सम्म भएका हवाई दुर्घटना जाँच प्रतिवेदनका सिफारिस विश्लेषण गरी प्रभावकारी रुपमा कार्यान्वयन शुरु गर्ने तथा हवाई उद्योग व्यवस्थापनतर्फ ड्रोन उडान अनुमतिलाई सरलीकृत गरी समन्वयात्मक उडान सञ्चालन गरिनेछ ।

उल्लेखित कामको अनुगमनका लागि पर्यटन सचिवको नेतृत्वमा गठन हुने समितिले कार्य प्रगतिको विवरण सार्वजनिक गर्नेछ । वर्तमान सरकार गठनपश्चात पर्यटन मन्त्रालयको कार्यक्षेत्रसँग सम्बन्धित पहिलो १०० दिनको कामलाई प्रभावकारी रुपमा कार्यान्वयन गरिने सचिव देवकोटाले जानकारी दिनुभयो ।

तपाईको प्रतिक्रिया

सम्बन्धित समाचार